Relisez le, ça va vous booster

برشة يقولولي اللي نطول برشة في الكتيبة و واحد يفد كيف يقعد يقرا برشة. اذاكة علاش هاني باش نكتب بالدارجة منكم ما تقلقوش و زيد المعلومة توصللكم احسن
يوم 17 فيفري خرجنا فرحانين و متفائلين باللي قالو سي عزيز و قلنا هذا النهار اللي كنا نستناو فيه اللي ستناوه خواتنا الكبار في شركتنا اللي ضحاو باش وصلت الطيران الجديد عندها اليوم 18 طيارة
قلنا زادة اللي سي عزيز بعد اللي عاشو من ظلم و اضطهاد من هاك اللي ما يتسماش جاتو الفرصة باش ياخذ ثواب من عند ربي و يعطي حق الناس اللي مهضوم من سنين و سنين
و جاو رحلات ليبيا و مصر و افريقيا نعمة من عند الله و قلنا شدة و ماشية للزوال
البارح جاتنا اهانة كبيرة البارح كلينا كف ما عمرنا ما كنا نستناو فيه خاصة اللي سوجرما و الطيارين خذاو حاجات طلبوها موش الكل و لكن خذاو و هذا معقول
و تأكدنا البارح اللي البهيم القصيّر هو طاقم الظيافة و ترفضت طلباتنا الكل اللي ما هاش مستحيلة و اللي هيا كان جات الدنيا دنيا رانا ما نخمّوش فيها أساساً
و بعد ما تحركنا يا جماعة اليوم بدات فماّ تحركات باش تهدى النفوس، و فماّ شكون فرح أماّ أنا مانيش فرحان. يا جماعة أنا تربيت في عايلتي راجل و في حومتي راجل و في شركتي راجل و مانيش باش نرضى بكعبة الحلوى اللي باش تتمدلي. أنا اليوم لا حاشي بترسيم و لا بفلوس و لا حتى شي أنا اليوم فدّيت مالوعود و نحب كرامتي ترجعلي خاتر بلاد كاملة قامت و قعدت و بن علي طار في جرّة الكرامة
و لذا يا جماعة لا رجوع إلى الوراء نحبو ترجع كرامتنا بعد إهانة البارح و لا و ألف لا مع النقاش في حلول وقتيّة ووعود و استنا شهر و شهرين و مبعد نقعدو نستنّاو في رحمتهم. هذية فرصتنا يا باش نعيشو و نتمتعو في خدمتنا اللّي قدمنالها كلّ التضحيات في وقتنا و عايلتنا و حياتنا و موش على خاتر الفلوس على خاتر تخلقت فينا حاجة غريبة اللّي هياّ حبّ نوفالار. نواصلوا النضال نواصلو التضامن ما ناخذش الحلوى ناخذو الممّو يزّي ما كلاو تواّ جا وقت الليّ باش نعيشو أحرار و بقدرنا و لاّ نستناّو الأنتريت كيف الكلاب حاشاكم حتى يجيو سيادنا و يرميو جرد العظمة اللّي باش توكّل صغارنا
عاش مضيف الطيران الجديد حرّا كريماً و لن يهان بعد اليوم
و هذا الكلّ في يدينا ما ترخّوش كلّموا صحابكم كلّمو الصحافة كلمّوا الإعلان
لقد ولدت اليوم ثورة المضيفين